Get Adobe Flash player

 

Maahmaah iyo Abwaan: Midkoodba hal aan ka idhi – W/Q. Sakariye-Awaare

Waxaynnu maqalnaa suugaan oo marka la qeexo noqonaysa iidaanka, quruxda iyo labeenta hadalka, waxaana soo hoos gala oo ay dallad u tahay dhammaan waxa la curiyo ama la hal-abuuro

oo u sii kala baxa bado fara badan. Sidoo kale waxa hoos yimaadda, Maahmaahda iyo odhaah-murtiyeedda dhaxal-galka ah.

Haddaba mawduuca qalin ku-qorkani wuxuu daarranyahay aragti-ahaan iyo ra’yi-ahaanba sida aan u aqaanno labadan Qodob:-

1: Waa maxay macnaha ereyga ABWAAN se qofkee ayaa lagu tilmaami karaa?

2: Waa maxay MAAH-MAAHDU se side ayay ku timaaddaa?

Hadaynu ku horrayno ereyga Abwaan lama macno aha keliya gabayaa, kumana koobna hal-abuur iyo suugaanyahan. Macno ahaan, intaas waa ka ballaadhan yahay. Waxa lagu tilmaami karaa qofka koobsaday badiba hibada hal-abuur-nimo, ku xeel-dheeraanta nolosha dhaqan-dhaqaale ee bulshadiisa, waayo-aragnimo dal iyo dad aqoon-nimo ku dheehantahay,  mufikir-nimo iyo ku talax-tagidda xeer dhaqanka miyyiga, garyaqaan-nimo, iyo guurti-nimo, aftahan-nimo iyo indheer-garad-nimo, samo talin iyo xillkas-nimo, ahna marjac loola noqdo ka hawaala-warranka waayihii tegay.!!

Qofkaas oo ay kulmeen sifooyinkaas oo ay qaarna yihiin hibo rabbi ku galaday oo dhalan ah, qaarna daraasad ku samaynta iyo ifa-faallaynta soojireenka nolosha, dhex-galka bulsho, iyo deegaankaba.

Lana odhan karo waa qaamuus loogu noqdo ka war bixintta dhamaan arrimahaa kor ku xusan sidaa awgeed ayaan loogu tilmaami Karin qof kasta oo suugaan curiya ABWAAN. Waana derejo lagu gaadho sifooyinkaas, sida aan askari kasta loogu tilmaami Karin MARSHALL. Mana aha in la qiima rrido ereyga dhumucdaa iyo miisaankaa leh, sida ammintan la joogo aynu ugu yeedhno shakhsi kasta oo isku toosiya afar tuduc ama aan si fiicanba u gaadhin Hal-abuur, kana faalloon Karin haba yaraatee wax ku aroora taxanaha soo jireenka dhaqanka soomaaliyeed, ama aan ka dheregsanayn magacyada Dhirta, Ugaadha, Dhul daaqsimeedka, Caynka meesiyada xoolaha, IWM ee gayigiisa ku nool.

2: Maah-maahdu waa murti iyo xikmad rasiin ah oon aad u dheerayn inta badanna ah sarbeeb iyadu is macnaysa.

Maah-maah kastaana waxay huwantahay dhacdo baaxad leh oo hadii la falanqeeyo bugaag noqonaysa. Mana aha wax intta la seexday oo la soo toosay la allifay. Ama curinteeda lagu cabiray dareen dhow oo qof u gaar ah. Mana aha wax qofku isaga oo gurigiisa jooga ku soo degta sida midhaha hal-abuurka qaarkood. Mana aha wax ku talo gal iyo dadoow idhagaysta maah-maah ayaan samaynayaa ku soo go’da. Kuwan imika jirana ragii yidhi nina kumuu tala galin umanuu soo tafa xaydan inuu maah-maah curiyo ee waxay ku yimaaddeen sida tan.

-Marka hore dhamaantood mid waliba waxay ku suntantahay sheeko,arrin, iyo dhacdo xaqiiqo ah. Hadaynu tusaalayaal kooban ka soo qaadanno.

A- badanaa waxay ku soo bexeen qof meel gole ah oo arrin lagu gorfaynayay wax laga waydiiyay kadibna isagoo arrinkii ka yaaban ku jawaabay odhaah murtiyeed kooban sidaana ay ku faaftay kuna noqotay MAAH-MAAH.

B- qof goob mahwiya kala kulmay wax aanuu markaa ka filanayn kuna tiraabay odhaah murtiyeed kooban sidaana ay ku faaftay kuna noqotay MAAH-MAAH.

C- qof isbedellka wakhtiga iyo waayaha ku arkay wax uu u qaadan waayay kana yidhi odhaah murtiyeed kooban sidaana ay ku faaftay kuna noqotay MAAH-MAAH.

Halkan kuma soo koobi karno sida ay ku yimaadaan maah-maahuhu laakiin su’aasha meesha taallaa waxay tahay. Waligeed malla arkay mana la maqlay qof yiri waxaan samaynayaa maah-maah? Haba fogaanne taariikhda maah-maahaha soomaalida meella kagama jirin, maanta laakiin waxa jira niman leh maah ayaannu samaynaynaa!!!! Maah-maah soomaaliyaa waxay tiraahdaa (GEELU HADUU LABADA DANBE HABEED KU LEEYAHAY WAA GED UU LAHAAN JIRAY, HADUU LABADA HORE KU LEEYAHAYNA WAA GED UU LA SOO BAXAY) hadaba maah-maahdu dhacday ku imaan jirtay, marka dhacdadii mid u eegi ku soo martana waad ku maah-maahaysaa,, lakiin hadii la yiraahdo bulshooy ogaada barri maah-maah ayaan samaynayaa,, waxa iswaydiin mudan xaaji aad samaysidbee halkee loo soo qaadanayaa?!!

Sakariye Saxardiid Axmed (Awaare)

This email address is being protected from spambots. You need JavaScript enabled to view it.

Qalinleyda © WeedhsanCorporation

Weedhsan Magazine: Download Free

.