Get Adobe Flash player

 

"Qalinkaa wax suureeya!"

Wacdaraha Maansada Hadraawi

Nadifa Mohamed Granta Award

Xogwarranka Macallin Dhoodaan

Sky News Interviews Abdirashid Duale

Weedhsan Magazine

Xilwareejintii Maryan Qaasim

Xogwarranka Aamina Weheliye

Kalsoonida Nafta

Baadisooc - Maxamed Baashe X. Xasan

ERGADII FURQAAN: Maansada Abwaan Hadraawi iyo Siiradii Nebi Muxammed “CSW”

Nebigii Ilaahow

Nuurkii Islaamkow

adigoo adduunkiyo

ifka weli ka maqan baa

lagu sii oddorosoo

ishaarooyin badan baa

dadku kaa arkeenoo

ayaamaha Illaahay

qaar baa astaanlee

toddobada ayaamood

Isniin baad ka dhalatoo

adduunyada xuskaagii

ololaa ka dhacayoo

urur-weyne goortii

ugxantaadu bururtaa

xiddiguhu ifeenoo

dayaxaa ilayskii

arladoo dhan gaadhoo

onkodkiyo hillaacaa

araggiyo wax maqalkii

ashqaraar ku ridayoo

Insigiyo jinkaa farax

Abshir dhaha la yidhiyoo

inta haadda duushiyo

idil habar dugaag baa

abaabuley ciyaaroo

dhirtu oogadaadiyo

afartaada geesood

ubax iyo caleen bay

ku ila-xidheenoo.

 

Ab tirsiimadaadiyo

 meeshaad ku ababtaa

dadku wada ogaayoo

Aaminatu* Wahab baa

kugu qaaday uurkoo

adigoo unkamayoo

weli soo if bixin baa

adoogaa xijaabtoo

nafta laga aroorshoo

Amran hooyadaa baa

ummushii ku dhimatoo

Allahay Xaliimuu*

igadh kaaga dhigayoo

iyaduu xilkaagii

adhaxdeeda saaroo

iyadaa laf-dhabartiyo

kugu qaaday adhaxdoo

abuurtaada Nebiyow

ulajeeddo weyn buu

ka lahaa Ilaahoo

hadba guri ammaanuu

Rabbi kugu ogaayoo

arrintaada meel buu

ku ilaalinaayoo

adigoo agoonaad

Maka adhi ku raacdoo

oon iyo harraad iyo

arrad iyo cagaag baad

u adkaysanaysee

Nebigii adeerkii

Abu Daalib koriyow.

 

Nebigii Ilaahow

adoo jooga keligaa

buur oogadeedoo

Adduunyada sirteediyo

ifa-faalaheediyo

ku dhex jira ammuuraha

ka qarsoon addoomaha

sow uur-ku-baaliyo

Malag kuuma imanoo

Iqra kuuma dhiginoo

Aayadaha Quraankiyo

magacyada Ilaahay

kuma odhan guddoomoo

runta kuma ogeysiin.

 

Dabadeed ayaantaas

Xaruntii Ilhaamkaa

idan kaaga yimiyoo

waxa Eebbe kaa wacay

cirka oogadiisoo

Nebow geenyo uguboo

amranoo la yaabloo

Ashkiraa ku qaadoo

Carshigaa il-bidhiqdeed

irriduhu furmeenoo

Ilaaheenna weyn baad

afti kala hesheenoo

noloshiyo iftiinkuu

kuu soo igmadayoo

Gaaliyo Islaamkuu

u arrimi ku yidhiyoo

urur-weyne waa taad

ka akhriday dhambaalkee

ummadoo dhan shirisee

arrintii dhacsiisee

ulajeeddo hadashee

oosha tidhi hoggaansama.

 

Inkastood wax yaabliyo

tustay dhawr astaamood

waa tay addoomuhu

afar iyo shan mooyee

kaa aamuseenoo

iimaansan waayeen

Aayadaha Quraankee

dhegahana ka awteen

ulajeeddadaadoo

adyadaa carruurtiyo

gardarada abwaanada

ushu kuma damqaynoo

samirkii Ayuub baad

kaga uur samaydoo

eeddooda waataad

u adkaysanaysee.

 

 

Waan-waanta Eebbiyo

amar baad sugaysee

goortii af daalee

odayadi Quraysheed

ergo lagala quustaa

abbaanduulayaashii

ka irdhoobey Diintee

 Ashahaada diiddiyo

arbayaashi qooqaa

Beder lagu umaadoo

lagu adhax wareemoo

ajar iyo jihaad baa

birta loo afaystoo

waaberi arooryaa

Uxud layska helayoo

eebiyo gantaal baa

lagu wada idlaadoo

dhiiggii ordaayaa

oodaha la tegayoo

ololkii Xunayn baa

boqorkiyo ugaaskii

indhashoodi duushoo

goobtii Axsaab baa

axan loogu kariyoo

utin kaa maqnayd baad

aarkeeda gudatoo

Kabcaada ajarankii

nafta lagula eertoo

libta lagu aroostaa

Xarameynku iidoo

uskagii ka maydhoo,

waxa laysku aaminay

"Aaway ku aaway

ambaqaad higgaadoo

Addin yaa Bilaal".

 

"Dhammideed adduunyada

afarteeda waaxyood

Eedaanka gaadhsii

Addin yaa Bilaal".

 

"Awliyada qarsoon iyo

iilkiyo xabaalaha

Aammiinta maqashii

Addin yaa Bilaal".

 

Allaahu Akbartii bay

daateen asnaamtii

Abu Jahal rumeeyoo

'Ilaahyadi' la beertee

ninba toban abuurtaa

Eedaankii dumiyoo

Allahay sir iyo caad

inu yahay mid keliyaad

asaraar ka saartoo

udubbada Furqaan baad

ku adkaysay ciiddoo

xididada u aastoo

 ummad kala qab-weynoo

Ashahaada karinoo

anbatoo hallawdoo

abtirsiimo lumisoo

is addoonsanaysoo

utin kala dhex-taalliyo

aar-doon ku madhatoo

usha laysku dhacayoo

ooduhu dhex-yaalliin

soo ururshihiiyow.

 

Dunidoo la iibshoo

dadku kala irdhooboo

dhasha aabbayaashii

nolol aasayaanoo

qof kastaa itaalkii

ku adeeganaayoo

ruuxaan awood-layn

la addoonsanaayoo

dadku ooyayaanoo

umal-taah ku seexdaan

Nebigii axsaantiyo

galladiyo abaalkiyo

soo rogey ammaankow.

 

Xaqa kama ajoodow

runta kama adkaystow

 

ammaanada ma lumiyow

dadka uma abtiriyow

ammaantaada Nebiyow

afku koobi maayee

waxaad olol bakhtiisiyo

waxaad eedo reebtiyo

waxaad iin daweysiyo

waxaad eel bogsiisiyo

waxaad aafo damisiyo

illinkaad bannaysiyo

dhaqankiyo asluubtiyo

garaadkiyo aqoontiyo

iimaanka sugan baa

dadku kaaga aayee

axdigaagu waa tiir

ummaddaadu mudantahay.

 

Rabbow adiga mooyee

Illaah kale ma jiro.

Marka xiga aqoonsani

Nebi Maxamed Eebbow

Ergadii Furqaan iyo

inuu yahay ma dhaafaan

Ambiyadda dhammaantood.

 

 Allahayow ha nagu xilin

noloshiyo adduunyada.

Eebbow sinnaantiyo

Islaamnimada xoogee.

Udgoonow Rasuulkii

ummaddiisa naga yeel

na illaali weligaa.

Rabbow iilka nagu dhawr

ifka nagu xannaanee.

Eebbow hortaadiyo

aakhiro qiyaamaha

Rabbiyow il debecdoo

naxariis leh nagu eeg.

Suugaanta Hadraawi © Weedhsan Corporation

Weedhsan Magazine: Download Free

.